Dem say na Peter Obi fit do am because say e no dey corrupt
Dem say na Tinubu fit do am because say e get the knowledge
Dem say na Atiku fit do am because say e get the experience
E don tire Nigerians, dem want messiah wey go change everything
Dem believe say the country go good if their candidate enter
Na so so hope dem dey get
Na play dem dey play, the government and the people dey play
How one man wan take save 200 million people?
No be play be that?
Dem dey find change when dem no even know wetin change dey about
Dem want change but dem no wan gree change
Dem dey play
Dem talk say politicians corrupt, na soso swear dem dey give them
But who elect the politicians wey corrupt?
Shey the people sef no corrupt?
If rain fall, danfo go double the money e dey collect from people
If dollar rise small, even ponmo woman go add money for her market
Everybody be scammer
Boss dey misuse power for office
Lecturer dey misuse power for university
Pastor dey misuse power for church
Election dey come and everything dey worse
Government dey make policy
Citizens dey make their own policy
Naira turn gold, e don get black market
Fuel don turn diamond, na person wey get money dey buy am
Light don enter prayer point, na to dey pray say make dem bring am
The government no do well
The people sef no do well
Na everybody corrupt
We dey find change when we sef no be better person
You no fit help your neighbour
You dey add plenty money for your market because say you get the power
If una like make Obi, Tinubu, or Atiku enter
Nigeria go still dey jagajaga if we no change
Messiah no dey come, na we be the Messiah.
© Judah Kolawole, 2023
Content Writer, Public Relations Specialist.
